Raithineach, a Bhean Bheag

Do chuireas mo ghearrachaile go Barra na hAoine

A d’iarraidh staimpí nó cácaí mísle.

Nuair a tháinig sí abhaile, ní bhlaisfeadh fear a’ tighe é,

Is raithineach, a bhean bheag, staimpí ‘s ím air.

Cur fá

Raithineach, a bhean bheag, a bhean bheag, a bhean bheag,

Raithineach, a bhean bheag, staimpí ’gus ím air;

Raithineach, a bhean bheag, a bhean bheag, a bhean bheag,

Raithineach, a bhean bheag, agus déanfaimíd an císte.

Tá tigh mór fairsiog I mBarra na hAoine;

Tá bean aca dh’á ghlanadh agus bean aca dh’á sgríobtha ann,

Is bean aca dh’á fhásgadh os cionn corcáin ar a díchioll,

Agus sean-bhean ar a corrogiob dh’á leathadh ar an ngríosaigh.

Cur fá arís.

Ní staimpí an t-arán so ná prátaí sgríobtha,

Acht plúr ó’n Spáinn trí áisíbh síoda;

An té íosfadh císte dhe ar maidin t’réis na hoidhche,

Do bhuaidhfeadh sé an rás ar thráigh mhóir na hAoine.

Cur fá arís.

Tá mná barr-fhionna i mBarra na hAoine,

Ní’l siad taitheach ar an staimpí seo scríobadh;

Meilid siad garbh é ‘s bíonn leacacha ‘na chroidhe istigh,

‘S bíonn cluig ar a gcarbail ar feadh lo-go-n-oidhche.

Cur fá arís.

Na mná fionna farsioga tá i mBarra na hAoine,

Ní gnó do chleachtaid siad staimpí do scríobadh;

Bíonn plúr geal na déise ‘ca i gcomhair na hoidhche,

Agus crústaí de’n tsórt sain go deó níor chuibhe dhóibh.

Cur fá arís.

Nuair a ghluaisigheann Máire, Siubhán agus Síle,

Nóra ‘gus Cáit, is sásta a bhíd siad;

An juga ar an gclár ‘s an cháirt d’á líonadh

‘S mo cheól go bráth sibh, a mhná, cois Aoine.

Cur fá:

Raithineach, a bhean bheag, a bhean bheag, a bhean bheag,

Raithineach, a bhean bheag, staimpí ’gus ím air;

Raithineach, a bhean bheag, a bhean bheag, a bhean bheag,

          ‘S is beag an mhaith an staimpí, mara mbeadh an t-ím air.